At werkskööl büürerei an amwelt tu beschük üüb Letj Muur
Saninj, a 22. august, wiar at werkskööl büürerei an amwelt faan a Jungen Union Nuurdfresklun tu beschük bi familje Hartwig-Kruse üüb at halig „Letj Muur“. At weder küd deheer dai ei beeder wees, ham küd teenk, at wiar ufstemet. Üüs skööl faan tjiin interesiiret JU‘ler wul ham tup mä Klaus Jensen, MdL auert leewent an a büürerei üüb a halgen informiire. Diartu skul föraal at problemaatik trinjam a wiljges diskutiiret wurd.
Letj Muur as en liitjeletj eilun maden uun a nuardsia. At halig hee knaap ens en fleche faan tau kwaadratkiilomeeter (ca. 175 ha) an at jaft man bluat fjauer werwer, huar uun’t gehial 24 haliglidj üüb lewe: Det san Noorderwerew, Hualewwai, Amaalienwerew an Neiwerew. Lokelkerwiis jaft at en rocht unseenelk skööl faan aacht jongen, huarfaan fjauer at letj haligskuul beschük. Sodening as uk a tukonft seeker! De gratst onerskias tesken en rocht eilun, üüs Feer of Pelwerem, an en halig, as dat at üüb en halig neen dik jaft (bluat en feest stiankaant). Diarauer sticht at weeder bi en grater sturemflud auer‘t haliglun an bluat a werwer mä hüsing luke noch ütj a nuardsia. Detdiar spiktookel kön a haliglidj so am an bi dörtigsis uun’t juar belewe.
Uunraised san wi de föörmadi faan Letjmuursil ütj mä en loor auer a loorendik. Üüb halig uunkimen, ging at gans rustikaal mä treker an waanj ap tu Noorderwerew. Diar ded üs Ruth Hartwig-Kruse en iinfeering, wat at het an lewe üüb en halig. So saad hat tu‘n bispal: „De Halliglüüd leven vun tominnst dree verschedene standbeen: Dat is för de Männer de Arbeit bi dat LKN (Landesbetrieb Küstenschutz, Nationalpark und Meeresschutz), denn kummt de Landweertschop, bi uns sind dat de Schaap, un letzten Enns dat Gewarf mit de baadelüüd.“
Tup mä Klaus Jensen diskutiired wi do altermaal auer a büürerei uun a naibüürskap faan a nationaalpark. Det ian of öler as heer dach was apartig. So kaam wi üüb dediar wai üüb a wiljges tu snaakin: Juar am juar tji föl düüsen ges troch nuurdfresklun an geesige uun a wos a halgen, diker an feenen uf. Wiar a ges iarjuaren föraal üüb a halgen tusen, haa a büüren nü tu dais uk üüb a grater eilunen an üüb feesteeg komer mä jo. De föörmaan faan at werkskööl, Benjamin Drozdz, hed betuaned: „At regiaring stäänt iandüütig an saner twiiwel uun a feroonswooring. Wi lewe heer uun en stianual kultüürlunskap. At tüüpisk lunskap an a artenfiilfalt haa saner büürerei neen bestun! At skul dach wel mögelk wees, dat mensken an wiljges freeselk tuplewe.“
A Haliglidj haa jo gratstendials mä a ges arangiiret. Üüb feesteeg an Feer skul a büüren oober uk nuadig skaasfrei häälen wurd, jo wurd maner faan a groltergus (Ringelgans) plaaget üüs faan a greenlungus (Nonnengans) an a grä gus (Graugans). Man diartu määnd Klaus Jensen: „Dat gifft hüütodaags keen Entschädigung mehr för Göös-Schaden. Ut rechtliche Grünn snacken wi vun een Oort „Gänse-Weideprämie“. Dat is nu all Vertragsnaturschutz!“
Gruppenfoto auf der Norderwarft
Eftert fing wi tu onguurd en riisengrat grilbüfee an altermaal leet jo det smeek. Beeft madi skul at do en betj ütj tu luupen gung. Wi fing en böös interesant feering faan Ruth auer Letj Muur. Hat wised üs a feestmaaged haligkaant mä en neimuudsk stiandik an fertääld üs ales, wat wi auer a halig-histoore wed wul. Widjer ging at tu’t ual sarkhoof an iin uun at letj haligskuul. Beeft en fein kop kofe raised wi do lokelk an tufrees weler uf. „Wir hatten bei herrlichem Sommerwetter und einer Menge neuer Informationen einen überaus interessanten Tag auf der Hallig. Hierfür möchten wir uns an dieser Stelle noch einmal herzlich bedanken!“, faadet a JU-föörmaan, Leif E. Bodin, tup.
