Angela Merkel wiar uun St. Peter-Urden
Sowat fu wi ei arke dai tu sen – tumanst ei heer bi üs uun Nuurdfresklun. Mundai, a 21. August 2017, wiar üüs Bundeskanzlerin Dr. Angela Merkel tu beschük uun St. Peter-Urden üüb Ääderstää. Diarmä as nü, saner twiwel, uk bi üs uun Nuurdfresklun an Dithmarschen-Nuurd a woolkamp uunkimen.
Tuföören wiar aueraal tesken Hüsem, Heide an St. Peter-Urden för detdiar grat feruunstalting plakatiiret wurden. At bleed hed sügoor diarauer skrewen an wi hed en mase halper tu faad fingen. Spiitigenooch wiar’t dan oober böös brüüsi, at hee bal de hiale dai riinjt an a san wul sü goor ei ütjkem. Iarst üüb a eftermadi klaaret det dan ap. An uuntesken wiar uk en gansen mase lidj, hiisige an baaselidj, tupkimen an wul at spiktaakel belewe.
Bi herelk sanskiin an salew gud tu mud wiar Angela Merkel do, am a klook fiif, üüb steed. At düüret oober noch en sküür, auerdet en arken en selfii mä hör haa wul of tumanst a hun sködle wul. As hat do oober entelk üüb a büüne stun an faan üüs aanj Bundestagskandidatin Astrid Damerow an üsens Ministerpräsidenten Daniel Günther begröötet wurden as, begaand hat hörens reed.
Üüb arke faal fant hat det heer uun Nuurdfresklun an St. Peter-Urden böös smok. An so fertääld hat tu began diarfaan, dat hat uk ens priwoot diar wiar. Eftert ging at do oober am a politik: Hat snaaket faan en Tjiisklun, huar wi uk widjerhen gud an hal uun lewe. So as juarling uk de CDU-woolkampsloogen. Man hat hee ham uk gud auer Nuurdfresklun an a regjuun informiiret. So wal hat en beeder infrastruktuur för’t lun trochsaat; dan hat witj genau, a struaten san böös wichtig för Nuurdfresklun. Saner en aanj autoboon, san wi diarüüb uunwised, dat a bundesstruaten, an jüst a B5, stödig wech ütjbaut wurd an ei ferwaarluase.
Natüürelk hed uk Astrid Damerow an Daniel Günther noch tu a lidj snaaket. Beeft en stünj wiar do oober ales förbi. Angela Merkel wurd noch mä en smok bilj faan a konstler Erhard Schiel an mä ruusen ferufskiased an skul do widjer tu Cloppenburg uun Niedersachsen. Uun’t gehial wiar’t en böös net an harmunisk feruunstalting uun St. Peter-Urden. An hoker witj, ferlicht komt Angela Merkel jo ens weler tu beschük.
(Fering – Föhrer Friesisch)
